الشيخ حاتم الحنفى
عدد المساهمات : 16
تاريخ التسجيل : 09/04/2010
العمر : 45
الموقع : منشاة برديس - البلينا - سوهاج elhanafy637@yahoo.com
 | | موضوع: حظر النقاب فى الأماكن العامة فى فرنسا السبت 22 مايو 2010, 1:00 pm | |
| أصدرت الحكومة الفرنسية قرارا بمنع ارتداء النقاب فى الأماكن العامة مما أثار حفيظة كثير من المسلميين فى جميع دول العالم
وبخصوص هذا الموضوع لا بد أن نبين الحكم الشرعى لذلك القرار بالعقل والمنطق وبعيدا عن التعصب أو الاتهامات بالتهتك أو إهانة المسلمين أو أى حاجة من دى
لابد نعرف أولا حكم النقاب فى الإسلام: وهو مختلف فيه أشد الاختلاف فمن الفقهاء من قال إنه فرض ومنهم من قال إنه ليس بفرض وأن عورة المرأة المسلمة الحرة هى جميع جسدها ما عدا الوجه والكفين وأنا رأيى (كإمام مسجد ومسئول أمام الله عن الكلام اللى باقوله) أن النقاب خصوصا فى الوقت الحالى غير مطلوب لعدة أسباب:
أولا: قول الرسول صلى الله عليه وسلم: "إن الدين يسر ولن يشاد الدين أحد إلا غلبه..." الحديث فناخد بأيسر الآراء لكن أنا والله لا أمنع أى واحدة تلبس نقاب خصوصا لو كانت فى مجتمع ضيق وكل الناس فيه عارفة بعضها أما المجتمع الواسع المفتوح فالكلام فيه فى النقطة الجاية
ثانيا: هناك قاعدة أصولية تقول: الضرورات تبيح المحظورات ، وأخرى تقول: دفع المضار مقدم على جلب المنافع
وهتقولولى إيه هى مضار النقاب فى هذا العصر؟ هاقوللكم: استغلال بعض المفسدين له فى بعض الأعمال التخريبية وإفلاتهم من العقوبة بسبب عدم معرفة شخصياتهم ، ياجماعة تخيلوا اننا قاعدين فى ميدان عام وجا واحد - أو واحدة - لابس نقاب ومن غير ما حد ياخد باله وفجأة طلع مسدس وضرب مجموعة مننا وركب بسرعة ورا زميله على الموتوسيكل وقال يافكيك ياترى إيه اللى ممكن يحصل؟ طبعا ولا واحد مننا هياخد حقه ولا هيشفى غليله بعقوبة هذا المجرم لأنه طبعا ما حدش شافه وطبعا سيادته هيستغل ده ويكررها أكتر من مرة - وهذه الواقعة على فكرة تكررت أكثر من مرة ما بين ارتكاب جرائم قتل وسرقة بالإكراه وخطف وغيره - لكن لو وشه مكشوف الفرصة أكبر لرؤيته والتعرف عليه والإمساك به للنيل منه وعقابه
ثالثا: مشكلة النقاب دلوقتى خدت كل اهتمام الناس والنساء على وجه الخصوص وشغلتهم المسألة الخلافية عن المسألة الأساسية والمنصوص عليها فى القرآن بصراحة وبلا خلاف وأصبحت مبينة بإننا بنهتم بالمسائل التافهة وسايبين المسائل الأساسية وطبعا هتسألوا: وإيه هى المسألة الأساسية وهقوللكم ان المرأة دلوقتى بقيت تلبس نقاب وملابس ضيقة غير مطابقة للشرع وأنا والله باشوف أشياء تحزن منها واحدة لابسة نقاب ولابسة على جسمها حتة فستان جينز وضيق ومحزق والسوستة هتضرب ، أو لابسة عباية لامعة وواصفة كل حتة فى جسمها ، أو فستان بألوان فاقعة يلفت نظر الأعمى... أو غير ذلك
بقى بالزمة دا مش منظر يحزن؟
رابعا: الرأى الذى يميل إلى أن النقاب فريضة أظن والله أعلم ان هو نفس الرأى الذى يقول بفرضية قرار المرأة فى البيت وعدم جواز خروجها من منزلها إلى المجتمع المفتوح بدون محرم
ولا انتو زى ما قال ربنا "أفتؤمنون ببعض الكتاب وتكفرون ببعض..." فلو عايزين النقاب طبقوا باقى الرأى على بعضه مش ناخد النص ونسيب النص وده يبقى اسمه "تلفيق" يعنى آخد اللى يعجبنى من كل رأى وأسيب اللى مش على مزاجى
عموما أنا قلت رأى الدين الذى أميل إليه ولو فيه أى حد اختلف معايا أنا محترم رأيه
وكما قال الإمام الشافعى: رأيى صواب يحتمل الخطأ ورأى غيرى خطأ يحتمل الصواب
والله أعلم | |
|
